پاکستانی فضائی حدود کی بندش کے باعث دہلی ایئرپورٹ پر پیر کی دوپہر سے رات ایک بجے تک 12 گھنٹوں میں 510 پروازوں میں تاخیر ہوئی۔ اس دوران آمد کی 250 پروازوں میں اوسط 55 منٹ کی تاخیر ریکارڈ کی گئی، جبکہ روانگی کی 260 پروازوں میں اوسطاً 65 منٹ کی تاخیر ہوئی۔ آپریشنل وجوہات کی بناء پر دہلی ایئرپورٹ پر مشکلات کا انڈیکس 5 تک پہنچ گیا۔ سب سے زیادہ تاخیر اندرون ملک پروازوں میں رپورٹ ہوئی۔ اس تناؤ کا آغاز مقبوضہ کشمیر میں 26 بھارتی سیاحوں کے قتل کے بعد پاکستان اور بھارت کے درمیان کشیدگی سے ہوا، جس کے نتیجے میں بھارتی پروازوں کے لیے پاکستانی فضائی حدود بند کر دی گئی۔
